siva.e rahmat-e-rab kuchh nahin hai
bahut kuchh tha magar ab kuchh nahin hai
jahan main huun magar kya janiye kyuun
mujhe duniya se matlab kuchh nahin hai
ye vaqt-e-naz.a hai kya nazr duun main
ab aa.e ho yahan jab kuchh nahin hai
andhere men vo sujhi ye na sujhi
tiri shab hai miri shab kuchh nahin hai
faqat taqdir ki kaaya palaT hai
munasib aur insab kuchh nahin hai
na puchho dil se us ki raah ka haal
siva-e-ishq maz.hab kuchh nahin hai
na ho gar sham-e-hijran ke barabar
tu bahar-e-vasl ik shab kuchh nahin hai
pas-e-dil ab kahan abadi-e-dahr
jo sab kuchh tha vahi sab kuchh nahin hai
ḳhuda ka vasta kya duun use main
jahan main jis ka maz.hab kuchh nahin hai
chaman tha jab chaman tha ashiyan bhi
vahin tha main jahan ab kuchh nahin hai
muhassal nazm-e-‘saqib’ ka na puchho
faqat lafzen hain matlab kuchh nahin hai
Leave a Reply