Meraj Faizabadi
ai dasht-e-arzu mujhe manzil ki aas de
meri thakan ko gard-e-safar ka libas de
parvardigar tu ne samundar to de diye
ab mere ḳhushk honTon ko sahra ki pyaas de
fursat kahan ki zehan masa.il se laḌ saken
is nasl ko kitab na de iqtibas de
aansu na pi sakenge ye tanha.iyon ka zahr
baḳhsha hai gham mujhe to koi gham-shanas de
lafzon men jazb ho gaya sab zindagi ka zahar
lahja bacha hai is ko ghazal ki miThas de
Leave a Reply