Duuba hua huun dard ki gahra.iyon men bhi
main ḳhanda-zan huun khokhli dana.iyon men bhi
uryan hai saara shahr chali yuun havas ki lahar
tujh ko chhupa raha huun main tanha.iyon men bhi
kaise the log jin ki zabanon men nuur tha
ab to tamam jhuuT hai sachcha.iyon men bhi
ab nek-namiyon men bhi koi maza nahin
pahle to ek lutf tha rusva.iyon men bhi
vo dauḌ hai kisi ko kisi ki ḳhabar nahin
ab kitni ghairiyat hai shanasa.iyon men bhi
rangin sa.aton men kahan vo malahaten
parchha.iyon ka jaal hai ra.ana.iyon men bhi
ham jin ke vaste the tamasha bane hue
dekha to vo nahin the tamasha.iyon men bhi
main hi tha vo jo apne hi teshe se mar gaya
hi hi tha shahr-e-jabr ke balva.i.on men bhi
kya daur hai ki jis men sada bhi sukut hai
tanha.iyan hain anjuman-ara.iyon men bhi
vo pyaar do ki jis ki chamak maand hi na ho
hota hai ye ḳhulus to harja.iyon men bhi
saaz o sada ke shor men gum ho gaya ‘jamil’
kis kis ke dil ka dard tha shahna.iyon men bhi
Leave a Reply