Jurat Ai Dil Mai O Mina Hai Wo Khud-Kaam Bhi Hai

jurat ai dil mai o miina hai vo khud-kam bhi hai

bazm aghyar se khali bhi hai aur shaam bhi hai

zulf ke niche khat-e-sabz to dekha hi na tha

ai lo ek aur naya daam tah-e-dam bhi hai

charagar jaane de taklif-e-mudava hai abas

maraz-e-ishq se hota kahin aram bhi hai

ho gaya aaj shab-e-hijr men ye qaul ghalat

tha jo mashhur ki aghaz ko anjam bhi hai

kam-e-janan mera lab-e-yar ke bose se siva

khugar-e-chashni-e-lazzat-e-dushnam bhi hai

shaikh ji aap hi insaf se farmaen bhala

aur aalam men koi aisa bhi badnam bhi hai

zulf o rukh dair o haram shaam o sahar ‘aish’ in men

zulmat-e-kufr bhi hai jalva-e-islam bhi hai

Leave a Comment