Saba Akbarabadi
us ko bhi ham se mohabbat ho zaruri to nahin
ishq hi ishq ki qimat ho zaruri to nahin
ek din aap ki barham-nigahi dekh chuke
roz ik taaza qayamat ho zaruri to nahin
meri sham.on ko havaon ne bujhaya hoga
ye bhi un ki hi shararat ho zaruri to nahin
ahl-e-duniya se marasim bhi baratne honge
har nafas sirf ibadat ho zaruri to nahin
dosti aap se lazim hai magar is ke liye
saari duniya se adavat ho zaruri to nahin
pursish-e-hal ko tum aaoge us vaqt mujhe
lab hilane ki bhi taqat ho zaruri to nahin
saikḌon dar hain zamane men gada.i ke liye
aap hi ka dar-e-daulat ho zaruri to nahin
bahami rabt men ranjish bhi maza deti hai
bas mohabbat hi mohabbat ho zaruri to nahin
zulm ke daur se ikrah-e-dili kaafi hai
ek ḳhun-rez baghavat ho zaruri to nahin
ek misra bhi jo zinda rahe kaafi hai ‘saba’
mere har sher ki shohrat ho zaruri to nahin
Leave a Reply