Meri Soch Mujhe Kis Rutbe Par Le Aai

Muzaffar Warsi

meri soch mujhe kis rutbe par le aa.i

da.ira-e-hasti ik nuqte par le aa.i

jab duniya ko main ne kor-e-nazar Thahraya

meri ankhen apne chehre par le aa.i

main to ik sidhi pagDanDi par nikla tha

pagDanDi mujh ko chaurahe par le aa.i

yuun mahsus hua apni gahra.i men ja kar

jaise koi mauj kinare par le aa.i

sahra men bhi divaren si phand raha huun

bina.i kis andhe raste par le aa.i

main ne noch ke phenkin jo shiknen chadar se

vo sab shiknen duniya mathe par le aa.i

kahkashan ke ḳhvab ‘muzaffar’ dekh raha tha

aur bedari ret ke Tiile par le aa.i