ḳhud se bichhaḌ ke zaat ke paikar men qaid huun
ghar se nikal gaya tha magar ghar men qaid huun
huun na.ara-e-jihad bhi azm-e-javan bhi
dil men kabhi muqim tha ab sar men qaid huun
mushtaq-o-muntazir huun ki chingariyan milen
kya ḳhuub aag ho ke bhi patthar men qaid huun
dekho to ka.enat dikha.i de zer-e-pa
sochun to jaise ḳhud hi samundar men qaid huun
vo to bula rahe hain magar ai ‘naresh’ main
apni ana ke gumbad-e-be-dar men qaid huun
Leave a Reply