ye ham ko kaun si duniya ki dhun avara rakhti hai
ki khud sabit-qadam rah kar hamen sayyara rakhti hai
agar bujhne lagen ham to hava-e-sham-e-tanhai
kisi mehrab men ja kar hamen dobara rakhti hai
chalo ham dhuup jaise log hi us ko nikal aaen
suna hai vo nadi tah men koi mah-para rakhti hai
hamen kis kaam par mamur karti hai ye duniya bhi
ki tarsil-e-gham-e-dil ke liye harkara rakhti hai
kabhi sar phodne deti nahin divar se ‘tabish’
ye kya divangi hai jo hamen nakara rakhti hai
Leave a Reply