tang aa ga.e hain kya karen is zindagi se ham
ghabra ke puchhte hain akele men ji se ham
majburiyon ko apni kahen kya kisi se ham
laa.e ga.e hain, aa.e nahin hain ḳhushi se ham
kam-baḳht dil ki maan ga.e, baiThna paḌa
yuun to hazar baar uThe us gali se ham
yarab! bura bhi ho dil-e-ḳhana-ḳharab ka
sharma rahe hain is ki badaulat kisi se ham
din hi pahaḌ hai shab-e-gham kya ho kya na ho
ghabra rahe hain aaj sar-e-sham hi se ham
dekha na tum ne aankh uTha kar bhi ek baar
guzre hazar baar tumhari gali se ham
matlab yahi nahin dil-e-ḳhana-ḳharab ka
kahne men us ke aa.en guzar jaa.en ji se ham
chheḌa adu ne ruuTh ga.e saari bazm se
bole ki ab na baat karenge kisi se ham
tum sun ke kya karoge kahani gharib ki
jo sab ki sun raha hai kahenge usi se ham
mahfil men us ne ghair ko pahlu men di jagah
guzri jo dil pe kya kahen ‘bismil’ kisi se ham
Leave a Reply