pas-ghubar-e-havas raat Dhalti rahti hai
nashe men chuur pighalti machalti rahti hai
ḳhabar yahi hai ki aghosh-e-hijr men pahron
tumhari yaad bhi pahlu badalti rahti hai
ye main ne dekha hai akasr phaTi purani hayat
sar-e-daricha-e-shab haath malti rahti hai
qafas se ham bhi nikalne ko kab se hain be-tab
magar vo sa.at-e-aḳhir jo Talti rahti hai
vo rang rang baharan hai khulta rahta hai
vo shaḳh shaḳh samar-var hai phalti rahti hai
hai ek kar-e-ziyan shahr shahr dar-badari
magar yahi ki tabi.at bahalti rahti hai
Leave a Reply