Aati Jati sans Kaise Tere Gham Se Man Gai

Mushaf Iqbal Tausifi

aati jaati saans kaise tere gham se man ga.i

kya bata.en zindagi ḳhud-raftagi kyuun ban ga.i

baat bhi sah len kisi ki ab kahan itna dimagh

tum se ruThe the laḌa.i dusron se Than ga.i

kaghazon se main tira uryan badan dhakne laga

jo bacha rakkhi thi ab tak vo mata-e-fan ga.i

reza reza chand palkon ki chaTanon par mila

raat kaale gham ki aise jhaaḌ kar daman ga.i

roz-o-shab ki ye masafat jaane kab hogi tamam

phir hava le kar hamare jism ka indhan ga.i