Faisal Ajmi
raḳht-e-safar hai is men qarina bhi chahiye
ankhen bhi chahiye dil-e-bina bhi chahiye
un ki gali men ek mahina guzar kar
kahna ki aur ek mahina bhi chahiye
mahkega un ke dar pe ki zaḳhm-e-dahan hai ye
vapas jab aao to ise siina bhi chahiye
rona to chahiye hai ki dahliz un ki hai
rone ka rone vaalo qarina bhi chahiye
daulat mili hai dil ki to rakkho sambhal kar
is ke liye dimagh bhi siina bhi chahiye
dil kah raha tha aur ghaḌi thi qubul ki
makka bhi chahiye hai madina bhi chahiye
Leave a Reply