Figar Unnavi
hasti ik naqsh-e-in.ikasi hai
ye haqiqat nahin qayasi hai
zauq tishna hai ruuh pyasi hai
saara mahaul hi siyasi hai
khub ga.i dil men har ada us ki
kaj-ada.i bhi ḳhush-ada si hai
dil hai afsurda to bahar kahan
baagh men har taraf udasi hai
un ko pa kar qarar aa.ega
ahl-e-dil ye bhi ḳhush-qayasi hai
sau hijabon men be-hijab hai husn
sau libason men be-libasi hai
mudda.a tak bayan nahin hota
bad-havasi si bad-havasi hai
un ko dekha nahin ‘figar’ magar
un ke jalvon se ru-shanasi hai
Leave a Reply