jinhen nigah uThane men bhi zamane lage
vo ja-ba-ja miri tasvir kyon sajane lage
hua hai tai vo safar ek jast men mujh se
ki jis pe paanv bhi dharte tujhe zamane lage
tire badan ki tabi.at se vaqafiyyat hai
main jaan ja.un agar mujh se tu chhupane lage
ḳhuda kare ki kahin tujh ko teri fitrat sa
koi mile kabhi phir meri yaad aane lage
ye kaisa hijr hai jis par guman vasl ka ho
tu mere paas rahe jab bhi uTh ke jaane lage
ye dil ajiib sa dil hai uTha ke divaren
tire ḳhayal ke aate hi un ko Dhane lage
tu apni umr ki mahrumiyan mujhe de de
main chahti huun tiri ruuh muskurane lage
Leave a Reply