Mai Ka Ye Ehtiram Are Tauba

Pandit Jagmohan Nath Raina Shauq

mai ka ye ehtiram are tauba

aur phir vo haram are tauba

dil ko sarmast kar hi deti hai

yad-e-saqi-o-jam are tauba

allah allah kar are zahid

jam-e-mai sub.h-o-sham are tauba

but-parasti men jis ki umr kaTi

aise kafir ka naam are tauba

ek be-jan ke qatl karne ko

is qadar ehtimam are tauba

gham-zadon ki ye ḳhamushi hai ghazab

sabr ka intiqam are tauba

aaj bhule se le liya kis ne

‘shauq’-e-rusva ka naam are tauba