Main Hun Ya Tu Hai Khud Apne Se Gurezan Jaise

main huun ya tu hai ḳhud apne se gurezan jaise

mare aage koi saaya hai ḳhiraman jaise

tujh se pahle to baharon ka ye andaz na tha

phuul yuun khilte hain jalta ho gulistan jaise

yuun tiri yaad se hota hai ujala dil men

chandni men chamak uthta hai bayaban jaise

dil men raushan hain abhi tak tire vaadon ka charagh

tutti raat ke taare hon farozan jaise

tujhe paane ki tamanna tujhe khone ka yaqin

tere gesu mire mahaul men ghaltan jaise

vaqt badla pa na badla mira mear-e-vafa

andhiyon men sar-e-kohsar charaghan jaise

ashk ankhon men chamakte hain tabassum ban kar

aa gaya haath tira gosha-e-daman jaise

tujh se mil kar bhi tamanna hai ki tujh se milta

pyaar ke baad bhi lab rahte hain larzan jaise

bhari duniya men nazar aata huun tanha tanha

margh-zaron men koi qarya-e-viran jaise

gham-e-janan gham-e-dauran ki taraf yuun aaya

janib-e-shahr chale duḳhtar-e-dahqan jaise

asr-e-hazir ko sunata huun is andaz men sher

mausam-e-gul ho mazaron pe gul-afshan jaise

zaḳhm bharta hai zamana magar is tarah ‘nadim’

si raha ho koi phulon ke gareban jaise

Leave a Comment