Wo Aksar Baaton Baaton Mein Aghyar Se Puchha Karte Hain

Zaheer Kashmiri

vo aksar baton baton men aghyar se puchha karte hain

ye sar-ba-gireban divane kis shai ka taqaza karte hain

ik din tha ki sahil par baiThe tufan pe tabassum karte the

ab mayusi ke aalam men sahil ka tamasha karte hain

ḳhatra hai vafa ke luTne ka majburi-e-dil bhi lazim hai

jiine ki tamanna karte hain marne ka taqaza karte hain

ma.asum sitamgar ki baten mazlum ada ke afsane

yuun raat basar ho jaati hai yuun dil ka mudava karte hain

jab nadani ka aalam tha hasil ki tamanna karte the

ab dil men aag lagate hain sho.alon ka tamasha karte hain

apne men rahe to rusva.i apne se ga.e to sauda.i

ham muddat se divangi-e-duniya ka tamasha karte hain