Juzw-O-Kul Ka Hum Is Andaz Se Rishta Samjhe

juzv-o-kul ka ham is andaz se rishta samjhe

dekh kar qatre ko mahiyyat-e-dariya samjhe

har ada teri ham-ahang thi dil se itni

har ada ko tiri ham dil ka taqaza samjhe

ham vo ḳhud-bin hain ki hangama-e-dil ke aage

saare hangama-e-giti ko tamasha samjhe

ham ko miTTi ke gharondon ki haqiqat ma.alum

jism ki ḳhaak ko ham nafs ka saaya samjhe

ham ki har nisbat-e-mauhum ko apnate rahe

ik shikasta se ta.alluq ko bhi kitna samjhe

ustuvar itna hua rishta-e-avaz ‘akbar’

dil ki dhaḌkan ko bhi ham dost ka lahja samjhe

Leave a Comment