Fariha Naqvi
ai miri zaat ke sukun aa ja
tham na jaa.e kahin junun aa ja
raat se ek soch men gum huun
kis bahane tujhe kahun aa ja
haath jis moḌ par chhuḌaya tha
main vahin par huun sar nigun aa ja
yaad hai surḳh phuul ka tohfa?
ho chala vo bhi nil-gun aa ja
chand taron se kab talak aḳhir
teri baten kiya karun aa ja
apni vahshat se ḳhauf aata hai
kab se viran hai andarun aa ja
is se pahle ki main aziyyat men
apni a.ankhon ko noch luun aa ja
dekh! main yaad kar rahi huun tujhe
phir main ye bhi na kar sakun aa ja
Leave a Reply