dil taḌapta hai mira har din sahar hone ke ba.ad
maut aa jaa.e na tere bin sahar hone ke ba.ad
shaam tak fursat na tujh ko saans lene ki mile
aa ke taklifen miri tu gin sahar hone ke ba.ad
raat aa.i aa.e maiḳhane men kafir ho ga.e
aur phir se ban ga.e momin sahar hone ke ba.ad
niind to kya chiiz ankhen band bhi ham ne na ki
jab vo bole a.enge lekin sahar hone ke ba.ad
chain dil ko aankh ko ThanDak ḳhirad ko tazgi
ne.amaten milna hai ye mumkin sahar hone ke ba.ad
un ke dil men meri ulfat yuun sama.i jis tarah
phuul men ḳhushbu hui sakin sahar hone ke ba.ad
raat bhar ashkon ko roke muskuraya tha magar
ho gaya zahir mira batin sahar hone ke ba.ad
ḳhauf aata hai mujhe ‘haidar’ zamane se bahut
aa ke ban ja tu mira zamin sahar hone ke ba.ad
Leave a Reply