Imran Aami
ham-sa.e men shaitan bhi rahta hai ḳhuda bhi
jannat bhi mayassar hai jahannam ki hava bhi
ye shahr to lagta hai kabaḌi ki dukan hai
khoTa bhi isi mol men bikta hai khara bhi
is jism ko bhi chaaT ga.i saans ki dimak
main ne use dekha tha kisi vaqt hara bhi
jaise kabhi pahle bhi main guzra huun yahan se
manus hai is rah se miri laghzish-e-pa bhi
is dasht ko pahchan rahi hain miri ankhen
dekha hua lagta hai ye an-dekha hua bhi
tum bhi to kisi baat pe raazi nahin hote
tabdil nahin hota muqaddar ka likha bhi
ab faisla-kun moḌ pe aa pahuncha mira ishq
dariya bhi hai maujud yahan kachcha ghaḌa bhi
mumkin hai men is baar bhaTak ja.un safar men
is baar mire saath hava bhi hai diya bhi
ye shahr farishton se bhara rahta hai ‘ami’
is shahr pe ik ḳhaas inayat hai saza bhi
Leave a Reply