Yunhi Dukh Ho Jawenge Kam Shahzade

yunhi dukh ho javenge kam shahzade

aa ja sukh ke khvab bunen ham shahzade

apne hosh ganva baithi huun phir se aaj

soch rahi huun tujh ko har dam shahzade

shahzadi ke khvab azaab na kar jaana

ho javengi ankhen pur-nam shahzade

meri ruuh men teri yaad utarti hai

haule haule maddham maddham shahzade

aisa sakht takallum akhir kyon bolo

kyon rahte ho barham barham shahzade

kab tak tanha tanha tuten bikhrenge

ruuh men ruuh ko hone de zam shahzade

shahzade kuchh aur na mange shahzadi

nikle teri banhon men dam shahzade

rafta rafta ho gae akhir tere naam

mera jivan mere mausam shahzade

tujh se hi manus hua so tu jaane

jag kya jaane dil ka aalam shahzade

aansu tujh ko Dhunden hain divana-var

shahzadi ki ankhen hain nam shahzade

kab tak tanha chunti jaae zakhm ‘rabab’

rakh mithe lafzon ke marham shahzade

Leave a Comment