abhi to ankhon men na-dida ḳhvab baaqi hain
jo vaqt likh nahin paaya vo baab baaqi hain
saza jo agle sahifon men thi tamam hui
magar sahifa-e-dil ke azaab baaqi hain
karoge jama bhala kaise dil ke shishon ko
abhi to dasht-e-falak men shahab baaqi hain
uḌa ke le ga.i andhi vo harf harf kitab
jo saf.ha saf.ha hain dil ke sarab baaqi hain
jo giili ret pe tufan bane guzar bhi ga.e
vo bhigi palkon men ab tak sahab baaqi hain
vahi to vaqt ki be-chehragi hai apni shanaḳht
ki jis pe ab bhi hazaron naqab baaqi hain
lahu ke phuul ḳhizan ashna nahin ‘tanvir’
ki dasht dasht shafaq ke gulab baaqi hain
Leave a Reply