Anjum Khaleeq
yahan jo zaḳhm milte hain vo silte hain yahin mere
tumhare shahr ke sab log to dushman nahin mere
talash-e-ahd-e-rafta men aja.ib-ghar bhi dekhe hain
vahan bhi sab havale hain kahin tere kahin mere
zara si main ne tarjihat ki tartib badli thi
ki aapas men ulajh kar rah ga.e duniya o diin mere
falak had hai ki sarhad hai zamin ma.adan hai ya madfan
mujhe bechain hi rakhte hain ye vahm o yaqin mere
main tere zulm kaise hashr tak sahta chala ja.un
bas ab to faisle honge yahin tere yahin mere
achanak kis tarah aḳhir ye duniya chhoḌ sakta huun
ḳhazane ja-ba-ja madfun hain zer-e-zamin mere
to jab mere kiye par hai mira anjam phir anjam
ye maazi haal mustaqbil to hain zer-e-nagin mere
Leave a Reply