Bilqis Zafirul Hasan
zakhm ko phuul kahen nauhe ko naghma samjhen
itne saada bhi nahin ham ki na itna samjhen
zakhm ka apne mudava kise manzur nahin
haan magar kyuun kisi qatil ko masiha samjhen
shoabada-bazi kisi ki na chalegi ham par
tanz o dushnam ko kahte ho latifa samjhen
khud pe ye zulm gavara nahin hoga ham se
ham to shoalon se na guzrenge na siita samjhen
chhodiye pairon men kya lakdiyan bandhe phirna
apne qad se mira qad shauq se chhota samjhen
koi achchha hai to achchha hi kahenge ham bhi
log bhi kya hain zara dekhiye kya kya samjhen
ham to begane se khud ko bhi mile hain ‘bilqis’
kis tavaqqo pe kisi shakhs ko apna samjhen
Leave a Reply