saanp sa leTa hua sunsan rasta samne tha
ḳhatra aghaz-e-safar men ek aisa samne tha
dasht men ghamsan ka vo ran paḌa tha kuchh na puchho
dhuup meri pusht par thi aur saaya samne tha
ab to un ankhon ke aage a.ina hai aur main huun
haa.e mizhgan kholne se pahle kya kya samne tha
buzdil aise the bhigo paa.e na apne haath tak ham
donon baazu the salamat aur dariya samne tha
main masafat ki tarah tha biich men simTa hua sa
pusht ki janib samundar aur sahra samne tha
vasl ke ḳhvabon men ab vo raushni baaqi nahin thi
hijr ki raton men sone ka natija samne tha
Leave a Reply