saaya tha mera aur mire shaida.iyon men tha
ik anjuman sa vo miri tanha.iyon men tha
chhanti thi shab ko chandni badal ki oT se
paikar ka is ke aks sa parchha.iyon men tha
koyal ki kuuk bhi na javab is ka ho saki
lahra tire gale ka jo shahna.iyon men tha
jis dam miri imarat-e-dil sho.ala-posh thi
main ne suna ki vo bhi tamasha.iyon men tha
uTTha usi se ziist ke ehsas ka ḳhamir
jo dard-e-dil ke zaḳhm ki pahna.iyon men tha
jab shahr men fasad hua to amir-e-shahr
dekha gaya ki aap hi balva.i.on men tha
behad hasin tha magar ‘azar’ mujhe to bas
yaad is qadar raha ki vo harja.iyon men tha
Leave a Reply