jab talak dil imaam tha hi nahin
koi aali maqam tha hi nahin
mustaqil ek be-sabati hai
kuchh yahan par mudam tha hi nahin
aao us ka ḳhitab sunte hain
vo jo mahv-e-kalam tha hi nahin
chalte chalte main aa gaya huun yahan
varna tujh se to kaam tha hi nahin
pi raha tha main us ki ankhon se
mai-kade men to jaam tha hi nahin
apni apni namaz thi sab ki
masjidon men imaam tha hi nahin
vo bhi dil ke pate pe aaya hai
ḳhat hamare jo naam tha hi nahin
main musafir tha apni rahon ka
raston ka ghulam tha hi nahin
roz jalta tha taq-e-jan men ‘sahar’
aur phir ek shaam tha hi nahin
Leave a Reply