Har Qadam Par Mujhe Laghzish Ka Guman Hota Hai

har qadam par mujhe laġhzish kā gumāñ hotā hai

chashm-e-sāqī kī navāzish kā gumāñ hotā hai

ye hijābāt-e-ta.ayyun mujhe manzūr nahīñ

fikr-e-āzād ko bandish kā gumāñ hotā hai

lutf-e-paiham na sahī jaur-e-musalsal hī sahī

har tavajjoh pe navāzish kā gumāñ hotā hai

un ke aage lab-e-iz.hār pe hai mohar-e-sukūt

ek ḳhāmosh parastish kā gumāñ hotā hai

maiñ qafas meñ huuñ qafas pesh–e-nigāh-e-sayyād

par-e-parvāz meñ jumbish kā gumāñ hotā hai

sirf tum dil kī tabāhī kā sabab kyā hote

baḳht-e-nā-sāz kī sāzish kā gumāñ hotā hai

baat ye kyā hai ‘urūj’ in kī har ik baat meñ aaj

apnī har tarz-e-guzārish kā gumāñ hotā hai

Leave a Comment