apna daman dekh kar ghabra ga.e
ḳhuun ke chhinTe kahan tak aa ga.e
bhuul thi apni kisi qatil ko ham
devta samjhe the dhoka kha ga.e
har-qadam par saath hain rusva.iyan
ham to apne aap se sharma ga.e
ham chale the un ke aansu ponchhne
apni ankhon men bhi aansu aa ga.e
saath un ke meri duniya bhi ga.i
aah vo duniya se meri kya ga.e
‘naqsh’ koi ham bhi jaa.en chhoḌ kar
jaise ‘mir’-o-‘ghalib’-o-‘sauda’ ga.e
Leave a Reply