Meer Hasan
ham se to kisi kaam ki buniyad na hove
jab tak ki udhar hi se kuchh imdad na hove
ham ko bhi nahin chain tire ghamzon se dilbar
jab tak ki naya ik sitam ijad na hove
ai aah zara uthiyo to ahista ki vo jo
thoda sa asar hai kahin barbad na hove
di thi ye dua kis ne mire dil ko ilahi
ujde ye ghar aisa ki phir abad na hove
dekha na kisi vaqt main hanste hue us ko
ye bhi koi dil hai jo kabhi shaad na hove
bhule se bhi bhulo na kabhi ghairon ka tum naam
aur naam hamara hi tumhen yaad na hove
kyuun dekho ho us ka qad-o-ru bulbul-o-qumri
kya samjhe ho tum ye gul-o-shamshad na hove
mar jaaen qafas men yuun hi ham aah tadap kar
itni jo khabar lene ko sayyad na hove
dil jal ke jahan surma hua qais ka ab tak
us ja pe jaras pahunche to fariyad na hove
mere liye qatil bhi agar hove to hove
par ghair ke haq men to vo jallad na hove
varasta jo ho qaid se hasti ke to behtar
par daam se tere ‘hasan’ azad na hove
Leave a Reply