kuchh faisla to ho ki kidhar jaana chahiye
paani ko ab to sar se guzar jaana chahiye
nashtar-ba-dast shahr se charagari ki lau
ai zakhm-e-be-kasi tujhe bhar jaana chahiye
har baar ediyon pe gira hai mira lahu
maqtal men ab ba-tarz-e-digar jaana chahiye
kya chal sakenge jin ka faqat masala ye hai
jaane se pahle rakht-e-safar jaana chahiye
saara jvar-bhata mire dil men hai magar
ilzam ye bhi chand ke sar jaana chahiye
jab bhi gae azab-e-dar-o-bam tha vahi
akhir ko kitni der se ghar jaana chahiye
tohmat laga ke maan pe jo dushman se daad le
aise sukhan-farosh ko mar jaana chahiye