Koi Nao Nahin Tayyar Karna

koī naao nahīñ tayyār karnā

mujhe aatā hai dariyā paar karnā

mohabbat kī nishānī huuñ tumhārī

mujhe tum dekh kar mismār karnā

maiñ ik zinda haqīqat ban chukī huuñ

nahīñ mumkin mirā inkār karnā

kahānī ḳhatm ho jaane se pahle

kahānī ik na.ī tayyār karnā

dil-e-kambaḳht ko aadat paḌī hai

hamesha ḳhvāhish-e-be-kār karnā

kisī ko guftugū karnā sikhānā

kisī ko sūrat-e-dīvār karnā

kabhī sochā nahīñ maiñ ne safar meñ

kisī kā rāsta dushvār karnā

mohabbat ‘rāshida’ ‘māhīn’ kyā hai

jise aatā na ho iz.hār karnā

Leave a Comment