Qamar Siddiqi
zahr ke tiir mire charon taraf khinchta hai
kya ajab shaḳhs hai apnon pe hadaf khinchta hai
phir vahi dil men udasi ke umaDte badal
phir vahi silsila-e-ḳhak-o-ḳhazaf khinchta hai
phir vahi qahr vahi fitna-e-dajjal ke din
phir vahi qissa-e-as.hab-e-kahaf khinchta hai
kaun si soi hui pyaas ka rishta jaaga
aaj kyuun mujh ko ye sahra-e-najaf khinchta hai
kaun se log the zulmat ke sahraon men
ki jinhen martaba-e-izz-o-sharf khinchta hai
Leave a Reply