mujh se mil kar ḳhud ko kya pa.ega tu
aur tanha ho ke rah ja.ega tu
ye ThiThurti dhuup hai is dhuup men
kaise apna ḳhuun garma.ega tu
haDDiyon ka dard piina hai to pi
varna saari umr pachhta.ega tu
saanp ke bil men na kar amrit talash
yuun to ḳhud ko bhi ganva aa.ega tu
teri parchha.in simaTti ja.egi
jaise jaise phailta ja.ega tu
tera patthar jism ho ja.ega chuur
jab kisi shishe se Takra.ega tu
yuun na ghonT un sang-rezo ke gale
ḳhud shikar-e-sang ho ja.ega tu
Leave a Reply