bhar paa.e jan-e-zar tiri dosti se ham
jiite rahe to ab na milenge kisi se ham
hain qafile ke saath magar hai ravish juda
milte hain sab se aur nahin milte kisi se ham
zikr-e-sharab-e-nab pe vaa.iz ukhaḌ gaya
bole the achchhi baat bhale aadmi se ham
paband-e-dair ho ke bhi bhule nahin hain ghar
masjid men ja nikalte hain chori chhupi se ham
duniya badal ga.i hai badal se ga.e hain kuchh
apni ḳhushi badal ke tumhari ḳhushi se ham
jaate kahan mila na phir apna pata kahin
pahunche to the bhaTak ga.e un ki gali se ham
‘natiq’ hami ko dil ne to kafir bana diya
ab kya kahen ki haar ga.e bid.ati se ham
Leave a Reply