Poet
gham hai kanTon ka na andesha bayabanon ka
ishq hai rah-numa aaj bhi divanon ka
ruuh tarik nazar kor mohabbat se gurez
kya farishton men hai shohra inhen insanon ka
lafz jazbat ki tasvir nahin ban sakte
shukr kaise ho ada husn ke ehsanon ka
dil-e-barbad se karte hain jise ham ta.abir
isi virane men ik shahr tha armanon ka
tujh ko is daur men hai nur-e-haqiqat ki talash
kaun samjha.e ki ye daur hai afsanon ka
mujh ko pahlu men vo dil chahiye jis men ‘sha.ir’
raushni sham.a ki ho soz ho parvanon ka
Leave a Reply