nalon se agar main ne kabhi kaam liya hai
ḳhud hi asar-e-nala se dil thaam liya hai
azadi-e-andoh-faza se hai riha.i
ab main ne kuchh aram tah-e-dam liya hai
uThti thiin umangen unhen baḌhne na diya phir
main ne dil-e-nakam se ik kaam liya hai
juz mashghala-e-nala o fariyad na tha kuchh
jo kaam ki dil se sahar o shaam liya hai
ḳhud puchh lo tum apni nigahon se vo kya tha
jo tum ne diya main ne vo paigham liya hai
tha tera ishara ki na tha main ne diya dil
aur apne hi sar jurm ka ilzam liya hai
gham kaise ghalat karte juda.i men tiri ham
DhunDa hai tujhe haath men jab jaam liya hai
aram ke ab naam se main Darne laga huun
taklif uTha.i hai jab aram liya hai
malum nahin ḳhuub hai jo vaqif-e-fan hain
‘vahshat’ ne mahakat se kya kaam liya hai
Leave a Reply