Raza Hamdani
chaḌhte hue dariya ki alamat nazar aa.e
ghusse men vo kuchh aur qayamat nazar aa.e
gum apne hi saa.e men hain haT jaa.en to shayad
khoya hua apna qad-o-qamat nazar aa.e
kya qahr hai har siine men ik hashr bapa hai
ik-adh gireban to salamat nazar aa.e
kuche se tire nikle to sab shahr tha dushman
har aankh men kuchh sang malamat nazar aa.e
ham kaise ye samjhen ki pasheman hai qatil
chehre pe na jab harf-e-nadamat nazar aa.e
ham morid-e-ilzam samajhte rahe un ko
dekha to ‘raza’ ham hi malamat nazar aa.e
Leave a Reply