shayad ab rudad-e-hunar men aise baab likhe ja.enge
samne dariya bahta hoga log sarab likhe ja.enge
aaj to ḳhair andheri raten aur azaab likhe ja.enge
ik din apni galiyon men bhi kuchh mahtab likhe ja.enge
palken yunhi phuul chunengi ankhen yunhi rang banengi
dast-e-dua se dida-e-nam tak ḳhvab hi ḳhvab likhe ja.enge
nadim ankhen soch rahi hain kal tariḳh saval karegi
itna qaht-e-mohabbat kyuun tha kya asbab likhe ja.enge
yunhi lahu-luhan nahin ham, tum bhi chalo is raah ko dekho
jo kanTe qadmon men chubhenge saare gulab likhe ja.enge
kabhi kabhi ye dhyan aata hai apne ba.ad bhi duniya hogi
lekin kaisi duniya hogi kaun se baab likhe ja.enge
roz-e-azal divar pe meri barish ke harfon se likha tha
tere naam likhe ja.enge jo sailab likhe ja.enge
Leave a Reply