is baat ki nahin hai koi intiha na puchh
ai mudda.a-e-ḳhalq mira mudda.a na puchh
kya kah ke phuul banti hain kaliyan gulab ki
ye raaz mujh se bulbul-e-shirin-nava na puchh
jitne gada-navaz the kab ke guzar chuke
ab kyuun bichha.e baiThe hain ham boriya na puchh
pesh-e-nazar hai past-o-buland-e-rah-e-junun
ham be-ḳhudon se qissa-e-arz-o-sama na puchh
sumbul se vasta na chaman se munasibat
is zulf-e-mushk-bar ka haal ai saba na puchh
sad mahfil-e-nashat hai ik sher-e-dil-nashin
is barbat-e-suḳhan men hai kis ki sada na puchh
kar rahm mere jeb o gareban pe ham-nafas
chalti hai ku-e-yar men kyunkar hava na puchh
rahta nahin hai dahr men jab koi aasra
us vaqt aadmi pe guzarti hai kya na puchh
har saans men hai chashma-e-haivan-o-salsabil
phir bhi main tishna-kam huun ye majra na puchh
banda tire vajud ka munkir nahin magar
duniya ne kya diye hain sabaq ai ḳhuda na puchh
kyuun ‘josh’ raz-e-dost ki karta hai justuju
kah do koi ki shaah ka haal ai gada na puchh
Leave a Reply