imtihan zabt ka phir bazm-e-gah-e-naz men hai
jalva-e-tur nigah-e-ghalat-andaz men hai
ahl-e-dil dida-e-tar dekh ke pahchan gae
main samajhta tha miri baat abhi raaz men hai
ashiyane ko nahin barq-navazi se panah
ek hi lutf vahi soz men hai saaz men hai
mere mitne ka karen sog kisi ke dushman
kyuun udasi si kisi jalva-gah-e-naz men hai
jan-e-naghma hai mire tuute hue dil ki sada
ik yahi tar-e-shikasta hai jo har saaz men hai
gul-o-bulbul se adavat nahin ‘kaifi’ lekin
kyuun huun bezar chaman se ye abhi raaz men hai
Leave a Reply