jab dil men kabhi vo mire mehman rahe hain
virane men bhi jashn ke saman rahe hain
aksar ye hua maslahat-e-ishq ki ḳhatir
har baat samajhte hue anjan rahe hain
anjam pe nazren hain magar kuchh nahin kahte
ham vaqt ki raftar ko pahchan rahe hain
ḳhud main ne bhi chaha tha jinhen puure na ho paa.en
aise bhi mire dil men kuchh arman rahe hain
ham un ke taghaful ko samajhte hain ik andaz
ye baat hai jis par vo bura maan rahe hain
ta.amir-e-nasheman ke hain andaz bahut ḳhuub
anjam jo hona hai vo ham jaan rahe hain
jin saḳht marahil se guzarna nahin mumkin
ham par vo marahil bahut asan rahe hain
is darja nazakat to tabi.at men nahin thi
har baat par ab aap bura maan rahe hain
kya meri ḳhamoshi ne ‘qamar’ un se kaha hai
ta-der vo mahfil men pasheman rahe hain
Leave a Reply