jabhi to zaḳhm bhi gahra nahin hai
jo sang aaya hai vo pahla nahin hai
kabhi chehre the a.ine nahin the
ab a.ina hai aur chehra nahin hai
ye ik sha.er ki jis ko ‘shauq’ kahte
kabhi ik haal men rahta nahin hai
kabhi har lafz e.ajaz-e-masiha!
kabhi yuun jaise kuchh kahna nahin hai
kabhi ankhen samundar si saḳhi hain
kabhi dariya men ik qatra nahin hai
bahut hain us ki darveshi ke charche
magar darvesh bhi aisa nahin hai
na raas aaya to ye bhi chhoḌ denge
tira darvaza hai duniya nahin hai
Leave a Reply