saans ki aanch men har lamha jhulaste hue log
ḳhvab ke naam pe jiine ko nikalte hue log
agle vaqton men jo jiine ka sabab hote the
ho ga.e ḳhvab vo sinon men dhaḌakte hue log
e’tibar itna bhi is ahd ke logon pe na kar
ye hain mausam ki tarah roz badalte hue log
ḳhubsurat to hai duniya magar aafat ye hai
ḳhaak ho ja.enge ye hanste chahakte hue log
majra-ḳhez kal ik ḳhvab tha dekha ham ne
biich dariya men the kashti se utarte hue log
zindagi naam hai shayad ki isi ka ‘anjum’
har qadam girte hue aur sanbhalte hue log
Leave a Reply