Poet
vasl men zikr ghair ka na karo
ḳhush kiya hai to phir ḳhafa na karo
zulfon par mujh ko shefta na karo
in balaon men mubtala na karo
meri itni to baat maano bhala
baat aghyar se kiya na karo
milne dunga na ghair se tum ko
karo mujh se milap ya na karo
mar bhi ja.un kahin ye rog miTe
ai tabibon miri dava na karo
munh chhupana hi hai agar manzur
mere ankhon-tale phira na karo
ai gul in dinon ro.o.ge
khilkhila kar bahut hansa na karo
bosa lene do kuchh to ho taqsir
hadaf-e-tir be-ḳhata na karo
jaan sadqe karun jo qadr karo
dil tumhen duun agar dagha na karo
kabhi fariyadtan suno meri
kaun kahta hai tum jafa na karo
ghair par kyuun nigah karte ho
mujh ko is tiir ka nishana karo
do-ghaḌi ke liye ham aa.e hain
talḳh baton se be-maza na karo
ek purze pe likh ke ye do-harf
dosto yaar ko ravana karo
jald aao ki dam nikalta hai
mujh ko piiTo agar bahana karo
‘bahr’ shakir raho muqaddar par
kas-o-na-kas se iltija na karo
Leave a Reply