ahmad-nadeem-qasmi

Waqt

sar-bar-avurda sanobar ki ghani shakhon men

chand billor ki tuuti hui chudi ki tarah atka hai

daman-e-koh ki ik basti men

timtimate hain mazaron pe charagh

asman surmai farghul men sitare tanke

simta jaata hai jhuka aata hai

vaqt be-zar nazar aata hai

sar-bar-avurda sanobar ki ghani shakhon men

subh ki nuqrai tanvir rachi jaati hai

daman-e-koh men bikhre hue khet

lahlahate hain to dharti ke tanaffus ki sada aati hai

asman kitni bulandi pe hai aur kitna aziim

nae suraj ki shuaon ka musaffa angan

vaqt bedar nazar aata hai

sar-bar-avurda sanobar ki ghani shakhon men

aftab ek alaao ki tarah raushan hai

daman-e-koh men chalte hue hal

sina-e-dahr pe insan ke jabrut ki tarikh raqam karte hain

asman tez shuaon se hai is darja gudaz

jaise chhune se pighal jaega

vaqt tayyar nazar aata hai

sar-bar-avurda sanobar ki ghani shakhon men

zindagi kitne haqaeq ko janam deti hai

daman-e-koh men phaile hue maidanon par

zauq-e-takhliq ne ejaaz dikhae hain lahu ugla hai

asman gardish-e-ayyam ke rele se hirasan to nahin

khair-maqdam ke bhi andaz hua karte hain

vaqt ki raah men mod aate hain manzil to nahin aa sakti

More Poems

Leave a Comment