jism apna hai koi aur na saaya apna
jaane is ziist se hai kaun sa rishta apna
tu ne kis moḌ pe chhoḌa tha mujhe umr-e-ravan
tak raha huun ka.i sadiyon se main rasta apna
sang-andaz hua shahr-e-sitam-pesha tamam
dil liye baiTha hai shishe ka gharaunda apna
ham rahe bhi to badalte hue mausam ki tarah
teri ankhon men koi aks na Thahra apna
jog le kar tiri ḳhatir liye galiyon galiyon
ik mughanni ki tarah dard bhi becha apna
ek be-nam ta.alluq bhi ab us ghar se nahin
muddaton jis men raha tha kabhi charcha apna
ik tira gham tha ba-har-rang jo shadab raha
is shajar ne na giraya koi patta apna
dil ki divaron pe ye rang-e-shab-e-tar to dekh
hadisa chhoḌ gaya hai koi saaya apna
ai gham-e-ḳhak-shuda jaag ba-rang-e-ash.ar
teri miTTi men milata huun main sona apna
kitne asnam tarashe hain tiri surat ke
jhank kar dekhe zara mujh men sarapa apna
Leave a Reply