poet

Haram Mein Muddaton Dhunda Shiwalon Mein Phira Barson

haram men muddaton DhunDa shivalon men phira barson

talash-e-yar men bhatka kiya main bar-ha barson

mahinon haath jode ki khushamad bar-ha barson

inhen jhagdon men mujh ko ho gae ai bevafa barson

maaz-allah is azurdagi ka kya thikana hai

jo puchha yaar se kab tak na bologe kaha barson

ghanimat jaan jo din zindagi ke aish men guzren

kisi ka bhi nahin rahta zamana ek sa barson

vahi khun-e-shahid-e-naz ab barbad hota hai

raha ban kar jo tere haath men rang-e-hina barson

hamari be-qarari ka zara tum ko na dhyan aaya

mahinon muntazir rakkha dikhaya rasta barson

zamane men hamesha har mahine chand hota hai

tira jalva nazar aata nahin ai mah-laqa barson

vahin par le chali be-tabi-e-dil vah-ri qismat

phira ki sar patakti jis jagah meri dua barson

ada ho shukr kyun-kar be-kasi o na-umidi ka

rahi hain saath furqat men yahi do ashna barson

na aaya ek din bhi vo but-e-be-rahm ai ‘jauhar’

utha kar haath kaabe ki taraf mangi dua barson

More Poems

Leave a Comment