abbas-rizvi

Dhuan Sa Phail Gaya Dil Mein Sham Dhalte Hi

dhuan sa phail gaya dil men shaam Dhalte hi

badal gae mire mausam tire badalte hi

simatte phailte saae kalam karne lage

lahu men khauf ka pahla charagh jalte hi

koi malul si khushbu faza men tair gai

kisi khayal ke harf-o-sada men Dhalte hi

vo dost tha ki adu main ne sirf ye jaana

ki vo zamin pe aaya mire sambhalte hi

badan ki aag ne lafzon ko phir se zinda kiya

huruf sabz hue barf ke pighalte hi

vo habs tha ki tarasti thi saans lene ko

so ruuh taaza hui jism se nikalte hi

More Poems

Leave a Comment